يوم الأربعاء :
انتشر خبر موافقة مجلس الوزراء  على إصدار عملة معدنية فئة 2 جنيه، في كل الصحف و المواقع و القنوات التليفزيونيه، و سعي مصر لتكون مركزاً إقليميا لإنتاج وسك العملات المعدنية للداخل وللخارج بدلاً من استيرادها أقراص خام. و كأننا أمام خبر سعيد سينهي كل مشاكلنا!
*** اليوم التالي، الخميس : ابتدأت المشاكل، بعض أصحاب المطاعم في الأحياء الشعبية ..و كأنهم قالو هي الحكومة أحسن مننا تفكر في قرص ب2 جنيه واحنا نايمين.. ؟ و أصدروا تاني يوم من نشر الخبر أقراص طعمية فئة 2 جنيه !!!

*** اشتكي لي أحد المواطنين أنه فوجئ عندما ذهب للمطعم الوحيد في منطقته أنه سيحصل علي 3 أقراص طعميه بدل أن يحصل علي السته التي اعتاد عليها هو و زوجته وابنه..! طيب هايشبعو ازاي؟؟!!

بعض أصحاب المطاعم ألغي قرص الفلافل ابو الجنيه.. علي الفور، والآخر يتذاكي و يأجل القرار شوية أو لم يلغي قرص الطعمية "ابو جنيه" وترك الموضوع لبعد أسبوعين مثلا.. حتي يستسلم المواطن وينسي الجنيه، واحده واحده..! !

لم أتكلم عن المطاعم في الأحياء الراقية او وسط البلد.. وأعرف أن قرصين الفلافل وصلوا ل 5 جنيه فيها..منذ فترة ومن عنده رحمه بالناس عنده القرص بجنيه ونصف !!

*** يا رئيس الوزراء: الطعمية والفول المدمس ،وثالثهما الرغيف.. هما الأكلة الشعبية الأكثر انتشارا في مصر..و اللي بيعتمد عليها الناس الطيبين (اللي أنا واحد منهم) ..هي قوتهم وكل حياتهم وهما الحاجه الوحيدة اللي باقيه لينا، أرجوك ثم أرجوك حافظ علي سعر "قرص الطعمية" حتي لو مش بتاكله، رحمة بالناس ويكفيهم ما أصابهم منذ الثالث من نوفمبر 2016.

* Azmy5050@gmail. Com