ٱخر الأخبار:
"مصر تُحذر من قطع العلاقات مع إسرائيل إذا دفعت الحرب سُكان غزة بالإتجاه للأراضي المصرية".
كان فين من زمان التحذير ده .. حتى علشان المسجد الأقصى مسرى الرسول وعلشان إخواننا الفلسطينيين وعلشان يبقى في وقفة ضد الإجرام والعربدة الإسرائيلية وعلشان إحنا قلنا.. مسافة السكة!..
عندما وجه الدكتور علي المصليحي، وزير التموين والتجارة الداخلية(بتاع الأغنياء بس) ، تهديدًا حاسمًا لتُجار السكر، وقال إن فيه مافيا تُجار تحتكر السكر، والسعر تخطى الـ 55 جنيه، والتُجار عملوا على تعطيش السوق؛ لتحقيق أرباح خرافية على حساب المواطن..(وأنت سيادتك فين ؟ بتشتغل إيه؟ ).
وأعلن الوزير : أنه (مسافة السكة سيذهب إلى مجلس الوزراء) ويُطالب د. مدبولى بقرار لفرض التسعيرة الجبرية لسلعة السكر، مانحًا التُجار مُهلة 10 أيام لعودة استقرار سعر السكر في الأسواق. فرحنا واستبشرنا وقلنا حباية الشجاعة هاتجيب نتيجة.. يا فرج الله!.
مع أن سيادته أمهل التُجار 10 أيام علشان يبيعوا اللي معاهم بسرعة ويكسبوا كويس والله شيء جميل جدا!.. المفروض نسميه وزير "الإمهال"..وزير "الإهمال" كله واحد. المُهم..جَت الحزينة تفرح ما لقيتلهاش مطرح..!.
للأسف تراجع الوزير عن كلامه أو كما يقول أهل البلد "لَحَس كلامه" وقال إيه "لست مع تطبيق التسعيرة الجبرية ولكن أطالب التجار بتحديد هامش ربح مقبول".
مع أن القانون يسمح بالتدخل الحكومي لتسعير السلع الإستراتيجية لمواجهة الحالات التي يتفق فيها التجار معًا على أن يبيعوا ما لديهم للمُستهلكين من سلع بأكثر من السعر المعقول؛ لمُحاربة جشع بعض إخواننا التُجار ومنع المُمارسات السيئة التي تضُر بمصالح أغلب الشعب.
أنا أتعجب من هذا الوزير اللي خلى حياتنا مرار من غير سكر .. و "لا بيهش ولا ينش" لماذا لا يغُرب عن وجهنا..جايز ربنا يكرمنا..! وأتذكر قول النائب مصطفى كمال في مجلس النواب في شهر يناير الماضي عندما استجوبوا الوزير حول ارتفاع الأسعار ونقص بعض السلع، وضعف الرقابة على الأسواق: "الناس يا معالي الوزير في الأول كانت بتسأل على سعر الفراخ بكام، دلوقتي بيسألوا على سعر الرجول بكام دلوقتي؟".
يا سيادة وزير البيض اللي بـ 150جنيه (الكرتونه) البصل اللي بـ 30 جنيه والرُز اللي بـ 40 جنيه والسكر اللي بـ 65 جنيه ولتر الزيت اللي بـ 70 واللحمه اللي بـ 400 جنيه (هيقولوا أسالوا وزير الزراعة، مع أن هو سيادته وزير التجارة الداخلية مش اللحمة دي برده تجارة ولا و لا صناعة؟) والفول المدمس أكل الغلابة اللي بـ 45 والفاصوليا الجافه اللي بـ 90 جنيه.
لا أجد ما أقوله للوزير إلا ما قالته ماري منيب في مسرحية "إلا خمسه"لعادل خيري: هو "إنتى جاية أشتغلي أيه؟".