عزمي المنشاوى يكتب.. التذكرة المخرَّمة يا عم مدبولي hold your horses!! الأربعاء 21 مايو 2025 -10:30 : مشاركة المقال تذكرة الأتوبيس اللي قدامنا دي أخذتها من سواق الميني باص.. وفكرت إيه اللي وصلها لكده.. والموضوع محتاجش تفكير كثير.. فنتيجة إن أسعار المحروقات بتزيد كل كام شهر.. الشركة زهقت وخرمتها(تخيل إنت بقي!). لو الشركة بتطبع كل ستة أشهر أو سنة ما بتلحقش تستهلك الكمية اللي طبعتها.. فجابو موظف ومسكوه الخرامة بتاع الورق.. وهات يا تخريم في التذاكر بهدف طمس الرقم اليمين.. يطلع رقم أربعة أو خمسة مش مهم.. ولسه!! قالك اللي يمشي ياما يشوف واللي يركب الأتوبيس في "قاهرة المعز" يشوف أكتر!! وشركة تانية.. جابت من الأخر وأكلت حته من كل تذكرة.. الراكب أخذ التذكرة "اللي فأر الغلاء أكل منها شوية" وكلم نفسه. وعلشان عندنا مسئولين على قدر المسئولية، فرد عليّ وعليهم الدكتور إبراهيم صابر، محافظ القاهرة، وقال إن قيمة تذكرة النقل العام فى القاهرة 10 جنيهات للأتوبيس العادي، والأتوبيس المكيف 20 جنيه (إيه الحلاوة دي)، أما خطوط شركات النقل الجماعي "ميني باص عادي 16 جنيها وميني باص مكيف 19 جنيها". (شكلنا كده داخلين قريبًا على الميني باص العادي أبو 20 جنيهًا والمكيف بـ 25..). وقال سيادة المحافظ إن بعض شركات النقل الجماعى ما زالت تستخدم التذاكر القديمة، ولم تطبع تذاكر مدون عليها التعريفة الجديدة. وأنا بأقوله لأ يا سيادة المحافظ .. الحكاية مش كده وإنت عارف وأنا عارف.. ويا ريت تقول لرئيس الوزراء "اهدى على نفسك شويه hold your horses" حتى لو مش رحمة بالناس، فيبقى علشان التذاكر اللي طبعتها الشركات تخلص براحتها.